सदस्यता वितरणमा त्रुटी भएको भन्दै पत्रकारहरूद्वारा धर्ना;

इन्दु पूर्वेली, बिर्तामोड । नेपाल पत्रकार महासंघ झापाले सदस्यता वितरणमा गरेको प्रकृयागत त्रुटी सच्याउन र भवन निर्माणको हिसाव-किताव सार्वजनिक गर्न माग राख्दै आन्दोलनरत पत्रकारहरुले शुक्रबार दोस्रो दिन पनि धर्ना कार्यक्रमलाई निरन्तरता दिएका छन् ।
साधारणसभामा भएको सहमति विपरित नेपाल पत्रकार महासंघ झापा शाखा नेतृत्वले एकपक्षीय ढङ्गमा ४२ जनालाई महासंघको सदस्यताका लागि सिफारिस गरेपछि नेपाल प्रेस युनियन, क्रान्तिकारी पत्रकार संघ र आदिबासी जनजाति पत्रकार संघ आबद्ध पत्रकारहरु विरोधमा उत्रिएका हुन् ।
चरणबद्ध विरोधका कार्यक्रम अन्तरगत बिहीबारबाट धर्ना शुरु गरेका पत्रकारहरुले शुक्रबार पनि ११ बजेदेखि २ बजेसम्म महासंघ झापा शाखाको कार्यालयमा धर्ना दिएका हुन् ।
धर्नापछि आयोजित संक्षिप्त कोणसभालाई सम्बोधन गर्दै नेपाल पत्रकार महासंघका पूर्व सभापति चिन्तामणि दाहालले महासंघ कसैको विर्ता संस्था हुन नसक्ने बताउँदै साझा फोरम बनाएर सञ्चालन गर्न वर्तमान नेतृत्वलाई सुझाव दिए । पूर्वेली टाईम्स July - 26 - 2013